Т.АНУ

Богд банк хувьцаа эзэмшигчдэдээ ногдол ашиг тараахаар болжээ. Энэ сарын 21-нд тус банкны Төлөөлөн удирдах зөвлөл хуралдан дээрх шийдвэрийг гаргасан байна. Учир нь Богд банкны хоёрдугаар улиралын цэвэр ашиг найман тэрбум төгрөг бөгөөд үүний 15 хувь буюу 1.2 тэрбум төгрөгийг хуваарилахаар болжээ. Ингэснээр нэгж хувьцаанд 19.28 төгрөг ногдох аж. Ногдол ашиг авах эрхтэй  хувьцаа эзэмшигчдийн нэрсийн жагсаалтыг ирэх сарын 9-ний өдрөөр тогтоосон байна. 

Тус банк 2021 оны арванхоёрдугаар сард анхдагч IPO арилжаагаа олон нийтэд нээлттэй зарлаж нийт хувьцааныхаа 20 хувийг арилжиж байсан. Одоогоор 62.5 сая ширхэг хувьцаа эргэлтэнд байгаа хэмээн Монголын Хөрөнгийн биржийн цахим хуудаст тэмдэглэжээ. Богд банкны нийт хувьцааны 73.06 хувийг “Бодь капитал” компани эзэмшдэг байна. 

Дашрамд дурдахад, Богд банк энэ сарын 7-ны өдөр Enabling Qapital хөрөнгө оруулалтын сантай зээлийн гэрээ байгуулж, дунд хугацааны санхүүжилтийг амжилттай татсан байна. 

Энэ санхүүжилтээр дунд болон урт хугацаанд санхүүгийн зайлшгүй шаардлага үүссэн жижиг, дунд, үйлдвэр, үйлчилгээ эрхлэгчдэд хөнгөлөлттэй зээлийн хүртээмжийг нэмэгдүүлэхийг зорьж буй. Түүнчлэн цар тахлын эрсдэлээ даван туулах, ажлын байраа нэмэх, хадгалах зэрэг зайлшгүй хэрэгцээтэй газарт нь зөв санхүүжилтийг олгохоор төлөвлөжээ. Мөн байгаль орчин, нийгэмд ээлтэй ажлыг эрчимжүүлэх, харилцагчдын эрэлт хэрэгцээг ухаалгаар шийдвэрлэхэд түлхүү анхаарч ажиллах юм байна.