“Эрдэнэс-Тавантолгой” компани хувьцаа эзэмшигчдийн ээлжит бус хурлаар ногдол ашиг хуваарилалтын тайлан, явцыг гүйцэтгэх захирал Б.Ганхуяг танилцууллаа. Тэрээр, компанийн ТУЗ хоёр жилийн бүрэн эрхийнхээ хугацаанд нийт 47 удаагийн хурлаар 119 тогтоол гаргасныг дурдав. Танилцуулгын дараа ТУЗ-ийн гишүүдийн бүрэн эрхийг дуусгавар болгох тухай болон гишүүдийг сонгох тухай  асуудлыг хэлэлцэн шийдвэрлэв.

“Эрдэнэс-Тавантолгой” ХК-ийн  ТУЗ-ийн  төрийн төлөөллийн гишүүнээр Уул уурхай, хүнд үйлдвэрийн яамны Төрийн нарийн бичгийн дарга Г.Нандинжаргал, Засгийн газрын Хэрэг эрхлэх газрын Дэд дарга Б. Энх-Амгалан, Ашигт малтмал, газрын тосны газрын орлогч дарга Ц.Эрдэнэбаяр, Мэргэжлийн хяналтын ерөнхий газрын дарга Т.Гантулга, Шударга өрсөлдөөн, хэрэглэгчийн төлөө газрын дарга Б.Бат-Эрдэнэ, Төрийн өмчийн бодлого, зохицуулалтын газрын Бодлого төлөвлөлт удирдлагын хэлтсийн дарга Ц.Баяр-Эрдэнэ, Хараат бус гишүүдээр Д.Батхишиг, Ү.Амарбат, П.Өлзийнаран, Х.Болор-Эрдэнэ, тус компанийн гүйцэтгэх захирал Б.Ганхуяг нарыг тус тус сонгожээ. 

Дашрамд дурдахад, “Эрдэнэс-Тавантолгой” компани энэ онд  Тавантолгой-Зүүнбаян, Тавантолгой-Гашуун сухайт чиглэлийн төмөр замын бүтээн байгуулалтын төслүүд болон Улаанбаатар хотын утааг бууруулах “Тавантолгой түлш” компанид шаардлагатай хөрөнгө оруулалт, санхүүжилтийг үе шаттайгаар шийдвэрлэж ажилласныг хурлын үеэр онцолжээ.