“Оюу толгой” уурхайн 155 сая ам.долларын татварын асуудлыг Рио Тинто эсэргүүцэж байгаагаа илэрхийлэв. Рио Тинтогийн охин компани болох “Turquoise Hill”: “Хэрэв Рио Тинто уг татварын асуудалтай тэмцэж чадахгүй бол 11 тэрбум ам долларын үнэлгээтэй тус уурхайд одоо төлдгөөс илүү татвар төлөх хэрэгтэй болно” гэж мэдэгджээ.

Авилгатай тэмцэх газраас 2009 онд Оюу Толгойн Хөрөнгө оруулалтын гэрээг хийхдээ тухайн үеийн эрх баригчид эрх мэдлээ урвуулан ашигласан байж болзошгүй хэмээн шалгаж байгаатай холбогдуулан Рио Тинто компани уг асуудлыг анхааралдаа авна гэдгээ мэдэгдсэн байна. Түүнчлэн “Татварын асуудлыг ажлын 60 хоногийн дотор шийдэхгүй бол олон улсын арбитрын шүүхэд хандана” хэмээн дурджээ. “Turquoise Hill” компани: “Рио Тинто хуулиар заасан бүх татвараа төлсөн.

Мөн татварын үлдэгдэл болох 5 сая ам.доллараа төлнө. 2013-2015 онд хамаарах 150 сая ам.долларын татварыг төлөхөөс татгалзах хэрэгтэй.” гэжээ.

Д.Түшигт-Эрдэнэ

Эх сурвалж: The Australian